羅馬書 2 · 粵讀聖經

管理員上載／人工修訂；未另行獨立校對。

1 所以，你呢個判斷人嘅，無論你係邊個，都冇得為自己辯解。你判斷人嗰陣，就係定自己嘅罪，因為你自己都做緊同樣嘅事。


2 我哋知道，上帝係按實情嚟審判做呢啲事嘅人。


3 你呢個人，判斷做呢啲事嘅人，自己又照做；你以為自己就逃得過上帝嘅審判咩？


4 又或者，你睇唔起佢豐富嘅仁慈、寬容同忍耐，唔知道上帝嘅仁慈正帶領你悔改咩？



5 但係，你硬心，又唔肯悔改，正為自己積埋上帝嘅怒氣。到上帝發怒、顯明佢嘅公義審判嗰日，你就要承受。


6 上帝會照住各人所做嘅事，畀返各人應得嘅：


7 嗰啲堅持行善，追求榮耀、尊榮同不朽嘅人，佢會賜永生畀佢哋。


8 至於嗰啲一味為自己爭利益、唔服從真理，反而順從不義嘅人，等住佢哋嘅，就係憤怒同烈怒。


9 患難同困苦會臨到每一個作惡嘅人，先係猶太人，亦都係希臘人，即係非猶太人。


10 不過，榮耀、尊榮同平安，就會臨到每一個行善嘅人，先係猶太人，亦都係希臘人。


11 因為上帝唔偏心。



12 凡係冇摩西律法而犯咗罪嘅人，都會喺冇律法嘅情況下滅亡；凡係喺律法之下犯咗罪嘅人，都會按律法受審判。


13 因為，喺上帝面前，聽律法唔等於係義人；實行律法嘅人，先會得稱義，即係畀上帝判為義人。


14 冇律法嘅外族人，照住本性做出律法要求嘅事嗰陣，佢哋雖然冇律法，自己就好似律法噉，成為自己行事嘅準則。


15 佢哋噉樣就顯示，律法要求人做嘅，已經寫咗喺佢哋心入面。佢哋嘅良心亦都為呢一點作證；心裏面唔同嘅諗法，會控告佢哋，又或者甚至為佢哋辯護。


16 上帝審判人嗰一日，佢會藉住耶穌基督，審判人嘅隱秘事；我傳嘅福音就係噉講嘅。



17 但如果你自稱係猶太人，倚靠律法，攞上帝嚟誇口，


18 又知道佢嘅旨意，識得分辨邊啲事更好，因為你受過律法嘅教導，


19 仲深信自己係盲人嘅嚮導、黑暗中嘅人嘅光，


20 愚昧人嘅導師、細路仔嘅老師，又有律法所表達嘅知識同真理；


21 噉，你教人，點解唔教自己呢？你向人宣講唔好偷嘢，自己又偷嘢？


22 你話唔好通姦，自己又通姦？你憎惡偶像，自己又偷神廟嘅聖物？


23 你攞律法嚟誇口，自己又違背律法，令上帝受羞辱？


24 正如經上寫住：「因為你哋，上帝嘅名喺外族人當中受到褻瀆。」



25 如果你實行律法，割禮的確有益；但如果你違背律法，你受過割禮，就等於冇受過。


26 噉，如果一個冇受割禮嘅人遵守律法嘅要求，佢雖然冇受割禮，唔係都會算係受過割禮嘅人咩？


27 嗰個天生冇受割禮、但實行律法嘅人，會定你嘅罪。你有成文嘅律法，又受過割禮，反而違背律法。


28 因為，唔係外表係猶太人，就係真正嘅猶太人；割禮亦唔係淨係喺外表、肉身上做嘅事。


29 內裏係猶太人嘅，先係真正嘅猶太人；真正嘅割禮，係個心受割禮，靠嘅係聖靈，唔係成文嘅律法。噉樣嘅人，得到嘅稱讚唔係嚟自人，而係嚟自上帝。



授權：CC-BY-NC-SA-4.0