哥林多前書 4 · 粵讀聖經

管理員上載／人工修訂；未另行獨立校對。

1 大家要噉样睇我哋：我哋係基督嘅仆役，係受托管理上帝奥秘嘅管家。

2 喺呢方面，对管家嘅要求，就係要睇得出佢忠心可靠。

3 对我嚟讲，畀你哋审查，或者畀人间嘅法庭审查，都係好小嘅事。我甚至连自己都唔审查。

4 因为我冇察觉自己有乜过失，但係噉唔等于我已经畀判为清白。审查我嘅係主。

5 所以，时间未到，你哋唔好作任何判断，要等主嚟。佢会照亮黑暗入面隐藏嘅事，将人心入面嘅打算显明出嚟。到嗰阵，各人就会得到上帝嘅称赞。

6 各位弟兄姊妹，前面讲嘅嘢，我都用自己同亚波罗做例子，係为咗你哋，等你哋喺我哋身上学识「唔好超出圣经上所写嘅」。好等你哋唔会各自偏向一个人，自高自大噉同另一个人作对。

7 係边个令你高人一等？你有边样嘢唔係领受返嚟嘅？既然係领受嘅，点解你仲要夸口，好似唔係领受返嚟噉呢？

8 你哋已经食饱喇！你哋已经发达喇！冇我哋份，你哋都做咗王喇！我真係巴不得你哋做咗王，好等我哋都同你哋一齐做王。

9 因为我觉得，上帝将我哋呢班使徒摆喺最尾，展示出嚟，好似判咗死刑嘅人噉；因为我哋成咗一场畀全世界观看嘅戏，天使同人都睇住我哋。

10 我哋因为基督，畀人当蠢人；你哋喺基督入面就咁精明！我哋软弱，你哋就强大；你哋受尊重，我哋就畀人睇唔起。

11 一直到而家，我哋又肚饿，又口渴，连衫都唔够着，又畀人打，亦都冇固定嘅住处。

12 我哋仲用自己双手辛苦做工。畀人辱骂，我哋就祝福佢哋；畀人逼迫，我哋就忍受；

13 畀人抹黑，我哋就好声好气噉劝佢哋。我哋变成好似世上清走嘅垃圾、人人抹走嘅污垢噉，到而家都仲係噉。

14 我写呢啲，唔係要令你哋羞愧，係要劝诫你哋呢班我心爱嘅仔女。

15 就算你哋喺基督入面有一万个照管同管教你哋嘅人，但係父亲就唔多；因为我喺基督耶稣入面，藉住福音生咗你哋。

16 所以，我恳请你哋，要效法我。

17 就係因为噉，我派咗提摩太去你哋嗰度。佢係我心爱嘅仔，喺主入面忠心可靠。佢会提醒你哋，我喺基督耶稣入面行嘅路，即係我点样行事为人；我喺各处每一间教会都係噉教导。

18 有啲人以为我唔会嚟你哋嗰度，就自高自大起嚟。

19 不过，如果主愿意，我好快就会嚟你哋嗰度。我到时要查明嘅，唔係嗰啲自高自大嘅人讲啲乜，係佢哋有乜能力。

20 因为上帝嘅国唔係靠说话，係靠能力。

21 你哋想点？想我带住管教嘅杖嚟见你哋，定係带住爱同温柔嘅心嚟呢？

授權：CC-BY-NC-SA-4.0